Марий Эл ТВ: Рӱдоласе школышто этностудий пашам тӱҥалын

Рӱдоласе школышто этностудий пашам тӱҥалын. Йошкар-Оласе 32-шо номеран школышто «Изолык» этностудий почылтын. Туныктымо программе почеш 7 гыч 15 ияш марте йоча-влакым марий йылме, литератур, кечышот пайрем, калык модыш, краеведений виктыш дене палдараш тӱҥалыт. Тиде паша марий калык йомак, тушто, калыкмут, мультфильм да тӱрлӧ электрон ресурс полшымо дене шукталтеш. Ик тунемме ийыште 22 занятий лиеш. Йоча-влакым кажне изарнян урок деч вара чылт яра туныктат. Занятий икымше да кокымшо сменылан посна эртаралтеш. 32-шо школ национальный йодышлан шуко тӱткышым ойыра. Тыге 5 декабрьыште «Марла чын возена» диктантым возаш тӱҥалыт, а 10 декабрьыште Марий тиште кечылан пӧлеклалтше мероприятийым эртарат.