Марий Эл ТВ: «Мурсескем» пайрем концертшым эртарен

Эртыше каныш кечын Кужэҥер районысо Йывансола тӱвыра пӧрт пеленсе «Мурсескем» калык фольклор ансамбль шке лӱмгече пайрем концертшым эртарен. 2 шагатат пеле шуйнышо пайрем кас кажне ончышылан куан да кугешнымаш кумылым луктын. «Мурсескем» фольклор коллектив Олык Ипай лӱмеш кугыжаныш премийын лауреатше, Россий Федераций калык тӱвыран сулло коллективше лӱмым нумалеш. Вургем, муро да куштымаш могырым Кужэҥер вел поянлыкыштым кумда репертуарыштышт аралат. Лӱмгече пайрем концертыште артист-влакым таумут да чап танык дене палемденыт.