Йошкар-Оласе школ-влак воктене йоча-влакын макетыштым вераҥденыт

Йошкар-Оласе школ-влак воктене «тунемаш вашкыше» йоча-влакын макетыштым вераҥденыт. Тиде лӱдыкшыдымылык правилым шуктымо дене кылдалтын. Фигур-влакым вӱдыжгым чытыше, кум лончан поликарбонат гыч ыштеныт. Нуным рӱдоласе 3-шо да 23-шо номеран школ воктене вераҥденыт. Тиде темлымаш дене тунемше-влакын ача-авашт лектыныт, кугыжаныш автоинспекций да олан мэрийже илышыш шыҥдараш полшеныт. Шонымо почеш, йоча-влакын фигурышт автомашинам виктарыше-влакын тӱткышыштым кугемдаш да школ воктене эркынрак кудалаш таратышаш.