Российын сулло да Марий Элын калык сӱретчыже Иван Ямбердов 70 ияш лӱмгечыжым палемда

Российын сулло, Марий Элын калык сӱретчыже Иван  Ямбердов 70 ияш лӱмгечыжым палемда. Волжск районысо Чодраялын эргыже Йошкар-Оласе 1-ше номеран музыкально-художественный школ-интернатым, вара 1975-ше ийыште рӱдоласе художественный училищым, а 1981-ше ийыште Суриков лӱмеш Москосо кугыжаныш институтым тунем пытарен. 1976-шо ий гыч тӱналын, мемнан республикысе гына огыл, Россий да тӱнямбал кӱкшытан ончер-влакын участникше. «В день свадьбы», «Отчий дом», «Голос  Земли» триптих да моло живопись пашаже-влак кумдан палыме улыт. Тыгак Йошкар-Олалан 400 ий темме лӱмеш «Праздник на площади» кугу живопись радынам сӱретлен.