Шкетан лӱмеш Марий кугыжаныш драме театр Александринский театрыште

Шкетан лӱмеш Марий кугыжаныш драме театр – черетан гастрольышто. Марий драмтеатрын да Мажит Гафури лӱмеш пошкырт академический драме театрын артистше-влак Антон Чеховын пьесыж почеш шындыме «Ваня чӱчӱ» спектакль-коллаборацийым «Александринский» Тӱнямбал театр фестиваль кышкарыште пырля модыныт.  Фестиваль 16-шо гана театр-влакым чумырен.  Спектакль Санкт-Петербург оласе Александринский театрыште эртен. Ушештарем, спектакльым самырык режиссёр Степан Пектеев шынден. Кум йылме, кок театр да ик режиссёр – тидын денак спектакль ойыртемалтеш.