Юрий Зайцев Марий Турек посёлкышто капитально олмыктымо кыдалаш школым аклен

Шинчымашым погаш у йӧн. Марий Турек посёлкышто кыдалаш школым капитально олмыктымо. Школ кок зданийыште верлана. Иктыштыже – тӱҥалтыш школ, весыштыже – 5-11-ше класс-влак. Марий Эл вуйлатыше Юрий Зайцев шуктымо пашан качествыжым аклен. Кыдалаш да кугурак класслаште тунемше-влаклан зданийыште леведышым, коммунал системым вашталтыме, актовый залым да библиотекым уэмдыме. Кабинетлаш мебельым, компьютерым налме, пищеблокышто технологий оборудованийым тичмаш вашталтыме. Тыгак спортзал уэмдалтын. Тыштак герой Сергей Иштуганов лӱмеш партым почыныт. Пайремыште  Юрий Зайцев да Россий Геройын ача-аваже лийыныт. Сергей шкеже кызыт службым эрта.