Козьмодемьянск оласе художественно-исторический тоштер тудым негызлыше А. Григорьевын лӱмгечыжым палемда

Козьмодемьянск оласе Александр Григорьев лӱмеш художественно- исторический тоштерын фондыштыжо 30 тӱжем наре документ аралалтеш. Нунын коклаште сӱретче Александр Григорьевлан возымо серыш-влакат улыт. Кызыт тоштер пашаеҥ-влак нуным электрон вариантышке савырыме пашам вӱдат. Амалжат уло. Тений сӱретчын шочмыжылан 135 ий. Нине серыш-влакым Александр Григорьевын пелашыже Евгения Григорьевна арален коден да тоштерлан пӧлеклен. Суретчылан возымо серыш-влакым шымлаш, лудын ончаш кумылан-влак лектыт гын, нуным тоштерыште вучена, - ойлат шанчыеҥ-влак.