Марий Элыште «Герои Марий Эл. Талешке-влак» регионысо кадр программын кумшо модульжо эрта

Марий Элыште «Герои Марий Эл. Талешке-влак» регионысо кадр программын кумшо модульжо эрта. Кокымшо модульышто специальный сарзе операцийын ветеранже-влак кугыжаныш виктем системын кузе чоҥалтмыжым шымленыт. Ты тапырым иктешлымеке, пӧръеҥ-влаклан тестирований формат дене кугу экзаменым кучаш да тунемме жапыште налме шинчымашым ончыкташ кӱлын. Кокымшо модуль шеҥгелан кодын. Кумшо модуль регион да муниципал виктемын негызшым тунеммашлан пӧлеклалтын. Палемдыман, кадр программын участникше-влак теорийым веле огыл тунемыт, шке шинчымашыштым практикыште тергат. Нуно районласе администрацийлашке, кундемнан вӱдышӧ предприятийлашкыже лектын коштыт.