Шочмо йылме да тӱвыра дене олимпиадын республикысе этапыште сеҥыше-влак ӱчашеныт

Шочмо марий йылме да литератур дене олимпиадын иктешлыше тапырже эртен.   Республикысе этапыште сеҥыше-влак регион-влак кокласе олимпиадыште шкеныштын вийыштым тергеныт. Иктешлыше йыжыҥыште 30 тунемше лийын. Ныл регион гыч, Марий Эл, Татарстан, Удмуртий республикыла, Свердловск кундем гыч, 9-ше гыч тӱҥалын 11-ше класс марте тунемше-влак толыныт. Олимпиадым почмаште марий йылмым да литературым туныктышо-влаклан тауштеныт. Нуно марий йылме деке ӱдыр-рвезе-влакым шӱмаҥден шогат. Олимпиадылан ямдылалтмаш ончычак тӱҥалыт. Татарстанысе Агрыз районысо Буймо кыдалаш школ гыч тыгай олимпиадышке кокымшо ий толыт. Тиде гана 10-шо классыште кок тунемше шочмо марий литератур дене шинчымашым терген.