Марий Эл гыч кок проект «Служение» премий верч таҥаса

Марий Эл гыч кок проект «Служение» премий верч таҥаса. Элыштына «Служение» Российысе премийлан темлалтше проект-влак верч калык йӱклымаш умбакыже шуйна. 63 тӱжем йодмаш гыч  йӱклымашке 110 проектым лукмо. Ты радам гыч кок проектше Марий Эл гыч: тиде Йошкар-Оласе Марий парк да Шернур округысо Марий Йӱштӧ Кугызан илемже. «Йӱштӧ Кугызан илемже» проект дене «Развитие территории – благополучие жителей» номинацийыште Шернур округым вуйлатыше Александр Кугергин темлалтын. Палемдыман, Йӱштӧ Кугызан илемже ынде шукертак калыкын йӧратыме верышкыже савырнен. Таче тудо Шернур кундемын да пӱтынь Марий Элын –брендше. Шернур округ администрацийыште палемдат, ий гыч ийыш турист-влакынат чотышт кушкын толеш.