Звенигово районысо краеведений тоштер Марий талешке кечылан пӧлеклалтше конкурсым эртара

Пашкан тукым улыт. Звенигово районысо краеведений тоштер Марий талешке кечылан пӧлеклалтше конкурсым эртара. «Пашкан тукым улына» конкурс Провой кундемын историйжым аралыме, самырык тукымын патриот воспитаний, йочан усталыкшым шуарыме амал дене кокымшо гана эртаралтеш. Кодшо ийын конкурсышто 4 команде таҥасен. Сеҥышыш Кужмарий школын «Уш куат» командыже лектын. Онар, Чоткар, Чубылат, Кронуш, Болтуш. Кажне кундемын шке онжо. Провой кундемын патырже – Пашкан. Тудо 16-шо курымышто Юлъялыште илен. Районысо конкурс верысе талешкылан пӧлеклалтеш.