Тазан илаш - куанле. Тиде шонымаш дене кажне ийын 11 сентябрьыште орвуян улмо кече палемдалтеш. Йошкар-Олаште медик волонтер, наркологий диспансерын специалистше-влак икмыняр ий рӱдоласе паркыште тиде кечын еҥ-влаклан таза илыш нерген умылтарат. Тиде кече Православий черкын темлымашыже дене 1913 ий гыч эртаралтеш. Тунамак аракам ужалыше лапке-влак пашам ыштен огытыл. Марий Элыште, Российын 17 регионжо дене пырля тиде кечын пеҥгыде йӱышым огыт ужале.