Самырык талант-влакым палемденыт. Йошкар-Олаште эртыше «Изи шӱдыр» регион-влак кокласе йоча усталык конкурсым Российысе калык-влакын икоян улмо идалыклан пӧлекленыт. Таҥасымаш онлайн ден очный формат денат эртаралтын. Тений ий еда эртыше пайремышке 30 наре участник погынен. Нуно мемнан республик гыч веле огыл, Моско ола ден Пошкырт кундем гычат толыныт. Коклаштышт – вокалист ден ансамбль-влак. Ийготым ончен, йоча-влакым кум категорийлан шеледеныт. 8 гыч 18 ияш марте йоча-влак ямдылыме номерыштым ончыктеныт. Нунылан «Муро» ден «Куштымаш» кок тӱҥ номинаций лийын.