Новые правила сдачи экзамена на водительские права вступают в силу с 1 апреля 2021 года. Регламент утвердили в МВД.

Марий Элыште чумыр Россий семынак тошто автомашина-влакым налме-ужалыме йӧн вашталтеш. 1 май гыч сделкым «Госуслуги» портал гоч пеҥгыдемдаш лиеш. Налме-ужалме ойпидышыште электрон кидпале шындалтеш, тидын дечын вара документ-влакым ГИБДД-шке регистрацийышке колтат. Тыглай сделкылан порталышке ПТС, СТС да ОСАГО полисым вераҥдыман. Тыгай йӧн дене тошто автшмашинам физический лица-влак веле ужален кертыт. Эксперт-влак палемдат: тыге автомашинан ончычсо озаже-влакым палаш утларак сай йӧн ышталтеш.  

«Интеллектуал» ресурс рӱдер Йошкар-Оласе 31-ше номеран школ дене ойпидышым ыштен. Тудым пилотный площадке семын ойыреныт. Этноблогер да волонтер-влак наставничество школым ыштат, йоча-влакым кугырак ийготан-влаклан полшаш кумылаҥдат, тыгак этноблогер пашалан туныкташ тӱҥалыт. 31-ше номеран школышто «Интеллектуал» рӱдер шкешотан почмо омса кечым эртарен, шке проектше-влак нерген каласкален. Тиде «Кувавайын шондыкшо» да «ЭтноБлогинг тайм». 

Республикын районлашкыже «Земский доктор» программе дене 29 медицин пашаеҥ пашам ышташ кая. Тидын нерген тазалыкаралтыш министерстве увертара. Тора яллашке 21 врач да 8 медшӱжар кайышаш. Нунылан оксам тӱлаш чылаже 36 миллион теҥге ойыралтеш. Кодшо ийын яллашке 42 специалист каен.  Рӱдӧ эмлымвер дечын тораште 7 врач да 8 фельдшер пашам ышташ тӱҥалыныт.  

Мэрийыште тӱшка субботник-влакын кечыштым ойыреныт. Йошкар-Олаште 9 да 24 апрельыште еҥ-влак пырля уремым эрыкташ лектыт. Олам эрыктыме тылзе 29 мартыште тӱҥалеш. Оласе администраций пӧртвиктарыше компаний, ТСЖ, организацийым вуйлатыше да амалкалче-влакым тиде пашашке чолган ушнаш ӱжеш. Субботник-влакын кечылаштыже, тыгак 10 да 25 апрельыште «Благоустройство» ушем пеҥгыде коммунал шӱкым яра налаш тӱҥалеш. 

Шошо шке жапше дечын вараш кодеш гынат, Йошкар-Оласе уремлаште лаке-влакым петыркалаш тӱҥалыныт. Кодшо кечылаште «Ола» муниципал предприятийын пашаеҥышт Кокшайский тракт, Киров урем, рӱдӧ кӱварыште пашам шуктеныт. Йӱдым температур 0 дечын ӱлнӧ, садланак тиде пагытлан келшыше технологийым кучылтыныт. Тудын годым лакышке оптымо вартыш писын кошка. Ола администрацийыште палдарат: лаке-влакым ончыкыжымат петыркалаш тӱҥалыт. Тиде пашан тӱҥ шонымашыже – игече тӧрланен шумешке, корным шотышко кондаш, а вара капитально тӧрлаш. Тений республикыште 200 километр наре корным ачалышаш улыт. Тидлан ик миллиард утларак теҥгем ойырат. Кугурак ужашыжым Киров гыч Строителей урем марте магистральым чоҥаш колтат.   

Илымверым утларак чоҥаш тӱҥалыныт, йоча шочмаш шагалемын. Маристат кок тылзаш регионын социал-экономике данныйжым иктешлен. Илымверым кодшо ий тыгаяк жап дене таҥастарымаште 20 процентлан шукырак чоҥеныт,  экспортышко сатум 10 процентлан шукырак колтеныт. Январь тылзыште кокла шот дене ончымаште, пашадар 6 процентлан ешаралтын, а пашадарлан тӱлымӧ парым 2 пачаш шагалемын. Январь тылзыште мужыраҥше-влакын чотышт 24 процентлан шукемын, ойырлышо-влак 8 процентлан шагалрак лийыныт. Йоча-влак, кодшо ий тиде жап дене таҥастарымаште,  17 процентлан утларак шочыныт, а колышо-влакын чотышт 28 процентлан ешаралтын. 

Регион вуйлатыше национальный проект-влакым илышышке пуртымо жапым шотышко налаш  кӱштен. Тений регионысо проект-влаклан 9 миллиард теҥге ойыралтеш, 21 объектым чоҥышаш улыт. Пашам национальный проект, тыгак регионым вияҥдыме  индивидуальный программе дене келшышын шуктат. Тидлан федерал бюджет гыч 1 миллиард теҥге ойыралтеш, кугу объект-влак коклаште аэропортым чоҥымо паша, Козьмодемьянскыште пассажир причал, тыгак Йошкар-Олаште автовокзал. Илымвер-коммунал озанлык инфраструктурым модернизироватлыме программе почеш, Советский район, Волжск олаште, Звениговышто канализаций объект-влакым ыштен шуктышаш улыт. Волжск олаште азам ыштыме отделенийым 2022 ий марте чоҥен шуктышаш улыт. Тачысе кечын тиде объект дене лимит гыч 11 процентшым ойырымо. «Содейстие занятости женщин» регионысо проект дене 2021 ийыште 4 йочасадым ыштат. Идалык мучаш марте 575 верым ыштат, Йошкар-Оласе Мирный микрорайонышто 320 веран, Руэм, Медведево да Нурма поселкылаште йочасад-влакым чоҥат. «Современная школа» регионысо проект дене келшышын,  Медведево поселкышто 1 декабрь марте школым нӧлтен шуктышаш улыт, тыгак Марий Турек район Сардаялыште у школ лиеш.  

Марий Элыште ковид дене черланымаш шагалемаш тӱҥалын. Россий кумдыкышто эпидемиологический обстановкым федерал кӱкшыштысӧ оперативный штабын совещанийыштыже каҥашеныт. Тудым Россий Правительствын вице-премьерже Татьяна Голикова эртарен. Регион вуйлатыше Александр Евстифеев мутланымашке ушнен. Эн шуко черле январьыште лийын, тудын дечын вара черланыше-влакын чотышт кок пачаш шагалемын. Пандемий тӱҥалме дечын вара республикыште 12 тӱжемат 366 еҥ черланен, тышечын 39 процентше – пенсионер-влак. Тыгак антирейтингыште медпашаеҥ, служащий-влак улыт. Регионышто коронавирус дечын тӱшка вакцинаций тӱҥалын. Тудо яра да шке кумылын эртаралтеш. Республикышке чылаже 21 тӱжем утларак дозо вакциным конденыт, тудым 19 медицин оргнизацийлаште шындат. Идалык мучаш марте Марий Элыште илыше-влак гыч 60 процентшылан прививкым шындаш палемдат. 

Теният республикыште «Шарнымаш садым» шындат. Элыште тиде акций кодшо арняште ик эн ончыч Грозный, Элиста, Новороссийскыште тӱҥалын. Севастополь олаште Василий Лановойым шарныме лӱмеш пушеҥге-влакым шынденыт. Тиде акций элын 85 регионжым авалта, тудо 22 июнь марте шуйна. Марий Элыште пӱртӱс ресурс министерстве тиде акций деке 27 апрель гыч 9 май марте ушна, 18 чодыра озанлыкын кумдыклаштыже пушеҥге-влакым шындышаш улыт, 8 майыште тӱшка акций Куяр чодыра озанлыкыште лийшаш. Кундемыштына чылаже 200 тӱжем изи пушеҥгым, Сеҥымашын 76-шо идалыкше лӱмеш 76 гектар кумдыкышто шындаш палемдат. Акцийышке волонтер, мер ушем, студент да школышто тунемше-влак ушнат.