Тений Марий Элыште 70 еш «За любовь и верность» медаль дене палемдалтын. Еш, йӧратымаш да ӱшанле улмо кече вашеш Медведево район гыч Осиповмыт ешым саламленыт. Нунылан медальым республикын социал вияҥмаш министрын алмаштышыже Андрей Компаниец кучыктен. Осиповмыт пырля 61 ий илат, Ириада ден Людмила ӱдыр-влакым ончен куштеныт. Шке жапыштыже Леонид Антонович Медведево район партийын инструкторжо лийын, райбыткомбинатым вуйлатен, бытовой обслуживаний министрын алмаштышыже пашам шуктен, а социал обслуживаний министрын алмаштышыже пост гыч сулен налме канышышке каен. Пелашыже Алефтина Александровна 1964 ийыште районысо библиотекыште пашам ышташ тӱҥалын, «Культурын сулло пашаеҥже» чап лӱмым сулен. Поселкышто тиде ешым пагалат. «За любовь и верность» медальым 25 ий пырля илыше вате-марийлан пуат. Нуно еш пеҥгыдылык дене калык колаште пагалымашым сулышаш да илышыште верым муышо йоча-влакым куштышаш улыт.
Комментариев: 0