Медведево районысо Руш Кукмор ялыште капитальный ремонт деч вара тӱвыра пӧрт пашам ышташ тӱҥалын. Кеҥеж мучко тыште леведышым да окнам вашталтеныт, кӱварым, пырдыжым, тувырашым шотыш конденыт, тыгак чыла инженер да коммуникаций вотым шотыш конденыт. Тыгай кугу пашам «Культура» нацпроект почеш шуктеныт. Тидлан 18 миллион утларак теҥгем ойыреныт. Тидын годым ешартыш шийвундым Медведево район администраций палемден. Ты окса дене тӱвыра пӧртыштӧ спортзалым тӧрлымӧ да зданий ончылсо тошкалтышым уэмдыме. Тудым ынде тысе пашаеҥ-влак уремысе сцене семынат кучылтын кертыт. Ушештарыман, тӱвыра пӧрт зданийыште тыгак йоча сымыктыш школ, спортзал, книгагудо да кок усталык коллектив пашам ышта. Туге гынат капитальный ремонт дене паша огеш мучашлалт. Умбакыжым тыште актовый залым тӧрлат, тушко кӱлеш оборудованийым налыт да кинотеатрым почыт. Тыгак модельный книгагудым ышташ шонымаш уло. Тидланат йодмашым возеныт. Уэмдыме пашам мучашлымылан, пӧлек семын, Эрик Сапаев лӱмеш опера да балет театр Руш Кукморысо тӱвыра пӧртын сценыштыже «Лебединое озеро» балетым ончыктен. Тиде тат верысе калыклан моткоч ӧрыктарыше лийын, вет тылеч ончыч ялыште тыгай сынан постановко-влакым икганат ончыктен огытыл.
Комментариев: 0