Регион вуйлатыше Юрий Зайцев Волжскышто лийын
Ик эн ончыч тудо 4-ше номеран школым аклен. Тушто «Пилотдымо авиаций системе» нацпроект дене классым келыштареныт. Тунемше-влак квадрокоптерым виктараш тунемаш тӱҥалыт. Тыгак школышто «Кванториум» пашам ышта, тудым «Образований» нацпроект дене почыныт. Учрежденийыште мебельым, техникым уэмденыт, цифровой лабораторий-влакым почыныт. Кодшо ийын школым капитально тӧрлымӧ, спортзал да школ тоштерым келыштареныт.
Тыгак Юрий Зайцев оласе тӱвыра да каныме паркыште лийын. Тудо оласе средам йӧнаным ыштымаш Российысе конкурсышто сеҥен. Вес ийын тушто у проектым илышыш пуртат ‒ йолешке-влакын коштмо корныштым тӱзатат, сценым чоҥат, йоча площадкым келыштарат.
Волжскышто «Родина» кинотеатрын зданийжым тӧрлат. Тудын олмышто шуко функциян тӱвыра рӱдер да йоча сымыктыш школ лиеш.
(Фотом Марий Элысе Виктерын сайтше гыч налме)
