Йошкар-Олаште Туруново шӱгарлаште Герой-влакын Аллейыштышт «Шарнымаш пушеҥгым» пу гыч скультптурым почыныт
Йошкар-Олаште Туруново шӱгарлаште Герой-влакын Аллейыштышт «Шарнымаш пушеҥгым» пу гыч скультптурым почыныт. Мероприятийыш СВО участник-влакын родо-тукымышт да лишыл еҥышт ушненыт. Скульптурым Александр Васенин пу гыч пӱчкеден луктын.
Ешарен кодаш лиеш, Регион вуйлатыше Юрий Зайцевын кӱштымашыже дене Герой-влакын Аллейыштымат тӱзатеныт, асфальтым шареныт, парковкым келыштареныт, шӱгар-влакым тӧрлатеныт. Июльышто регионысо бюджет гыч 526 тӱжем теҥге, Йошкар-Олан бюджетше гыч 324 тӱжем теҥге ойыралтын, тыгак «Боевое братство» ушемын ветеранже-влакат шке надырыштым погеныт. Тиде шийвундо дене пурымо верым шотыш кондат.
(Фотом Марий Элысе Виктерын сайтше гыч налме)
