Тений сентябрь тылзыште Йошкар-Олаште финн-угор калык-влакын Россий кӱкшытан форумышт лиеш
Тений сентябрь тылзыште Йошкар-Олаште финн-угор калык-влакын Россий кӱкшытан форумышт лиеш. Тидын вашеш Марий Элын Вуйлатышыже Юрий Зайцев Россий Федерацийыште финн-угор калык-влакын ассоциацийыштын председательже Петр Тултаев дене вашлийын.
«Ме палена, Марий Эл ‒ ӱшанле партнер. Российыште марий-влак финн-угор тӱшкан вожшо улыт. Тыште йылмым аралымаште, тӱвырам вияҥдымаште кугу опыт погынен. Йылмын цифровизацийже шотышто Марий Эл шуко пашам ышта, тидын дене тудо ончылно. Формумым вашлияш ямде улмылан тау», ‒ палемден Петр Тултаев регион вуйлатышылан.
Марий Элыште ятыр финно-угор мероприятий эртаралтеш: финн-угровед-влакын Россий кӱкшытан шанче конференцийышт, «Богатство финно-угорских народов» тӱнямбал студент форум, финн-угор калык гыч йоча-влакым ушымо лагерь, финн-угор театр-влакын фестивальышт да молат. Марий Элыште «Финно-угроведение» тӱнямбал шанче журнал лектеш. 2023 ийыште Республикыште почылтышо Калык-влакын келшымаш пӧртышт мероприятийм кугу кӱкшытыштӧ эртараш ешартыш йӧным пуа.
