Владимир Путин тиде мероприятийым тӱрлӧ ийготан еҥым ушышо, спортым йӧратыше-влакын пайремыштлан шотлен. Мемнан кундемыште чыла гаяк районышто кумылан-влак ечыгорныш лектыныт, тений тӱҥ старт Волжск олаште лийын. Тушко 1000 еҥ чумырген. Шукын еш дене толыныт. Эн изи ийготан 2 ияш лийын. Кумылан-влак 5 километрым да 10 километрым куржыныт, тыгак 2025 метр кужытан старт лийын. 5 километрым куржмаште ӱдыр-влак коклаште ‒ Юлия Грушевская, рвезе-влак коклаште Александр Тораев финишыш ик эн писын толыныт. 10 километран дистанцийыште ӱдырамаш-влак коклаште ‒ Чулпан Зуева, пӧръеҥ-влак коклаште Роман Важенин ик эн писе лийыныт.