Лишыл жапыште еҥ-влак «Формирование комфортной городской среды» федерал проект дене келшышын, йӱклымашке ушнен кертыт. Йошкар-Олаште «Дубки» микрорайонышто кумдыкым тӱзатен кертыт. Россий Армий тӱвыра полат шеҥгелне кумдыкым шукертак тӧрлаш кӱлеш. Тиде микрорайон 90 ий ончыч вияҥаш тӱҥалын, Октябрьын 12-шо идалыкше лӱмеш заводым ыштымеке, тушто пӧрт-влакым нӧлташ тӱҥалыныт. Микрорайон 50-ше ийла мучаште утларак чоҥалташ тӱҥалын, тушто военный городкым ыштеныт. Микрорайонышто илыше-влак улшо спортивый площадкым тӱзаташ кӱлмым палемдат. Тушто стадионым тӱзаташ, спорт снаряд-влакым ышташ шонымашышт уло. Проект конкурсышто сеҥа але уке, еҥ-влакын йӱклымашышт гычын палдырна. Ушештарена, 26 апрель гыч 30 май марте 2022 ийыште тӱзатышаш кумдык-влакым ойырымо шотышто йӱклымаш тӱҥалеш. Йошкар-Олаште илыше-влак 19 оласе кумдык верчын шке йӱкыштым пуэн кертыт. Могай проект эн шуко йӱкым пога, тудым вес ийын тӱзаташ тӱҥалыт. 14 ий дечын кугырак йоча-влакат тиде йӱклымашке ушнен кертыт.
Комментариев: 0