Йоча лагерь-влак кеҥежлан ямде улыт. Тидым Александр Евстифеев Роспотребнадзор, МЧС, исполнительный кучем орган-влак дене пырля терген. Вуйлатыше «Кооператор» лагерьыште лийын. Каныме вер Шап ер серыште верланен, икымше смене тушто 5 июньышто тӱҥалеш. Директор Нина Ершова палемден: тений тыште 15, 21 кечаш ныл смене лийыт. Лагерь кумдыкышто ик пачашан 4 корпус уло, пӧлемыште 8 вер. Шокшо да йӱштӧ вуд эреак уло. Александр Евстифеев модмо пӧлем, тыгак каныме залыште лийын. Лагерь дене пырля тиде верыштак санаторий уло. Тушто йоча-влак идалыкын чыла пагытыштыже канат. Санаторийыште иканаште 100 йоча канен кертеш гын, лагерь 170 еҥым вашлиеш. «Кооператор» лагерьыште лийыме годым посна тӱткышым лӱдыкшыдымылык йодышлан ойыреныт. МЧС пожар лӱдыкшыдымылыкым терген. Лагерь ден санаторийыште санитар правилымат чот эскералтеш, пищеблокыштат тиде пашам эреак шуктат.
Республикыште тений 16 тӱжем утла икшыве кеҥеж пагытыште канаш да тазылыкшым пеҥгыдемдаш тӱҥалеш, тидын радамыште 7 тӱжем утла икшыве неле илыш ситуацийышке логалше улыт. Ончен лекме лагерь ден санаторийлаште специалист-влак ситыдымашым палемден огытыл, но Медведево районлан вес ийысе бюджетышке корным ыштыме пашам пурташ темленыт. Россий Президентын Федерал Собранийлан посланийже дене келшышын, тений йоча-влакын лагерьлаште канымыштлан кэш-бек программе пурталтын. Республикыште тудо икмыняр лагерьлаште вийым налеш: тиде «Кооператор» санаторий, «Шап» йоча комплекс, «Большая медведица» йоча лагерь, Яльчик, Илеть лагерьла да моло учрежденийлаште. Кызыт нине оргнизаций-влак программымым илыш пурташ ойпидыш-влакым пенгыдемдат.
Комментариев: 0