Марий Эл ТВ: Марий Элысе МЧС-ыште изи куатан пуш-влак шотышто кугыжаныш инспекцийын пашаеҥышт ий кӱжгытым тергат

Йӱдым юалге, кечывалым леве. Эҥер ден ерыште ий шулаш тӱҥалын. Марий Элысе МЧС-ыште изи куатан пуш-влак шотышто кугыжаныш инспекцийын пашаеҥышт ий кӱжгытым тергат. Тыгак колызо-влаклан лаштыкым пуэдат. Йошкар-Олаште, мутлан, ик эн лӱдышкӧ вер - Ширяйково микрорайонышто рӱдӧ каныме пляж кумдык. Тыгак специалист-влак шошым чӱчыкыдын Вознесенский черке шеҥгелне улшо кумдыкым тергат. Тыгай мероприятийым нуно кажне ийын икмыняр гана шуктат.