Марий Элыште «Отец Героя» фотопроектлан тӱҥалтышым пыштыме. Портретыште ынде боевой действий ветеран-влакын ачашт. Нуно шочшыштын фотографийыштым кидыштышт кучат, вачӱмбалнышт — наградан китель. Тиде проектын кӱлешлыкше моткоч кугу. Кажне фотографий шеҥгелне — ойго, йомдарымаш, тидын годымак пытартыш марте шочмо эл верчын кредалше шочшо верч кугешнымаш. Тыгаяк шонымаш дене Советский район гыч Виталий Рябчиков Александр эргыжым шарналтен ты проектыш ушнен.