Марий Эл ТВ: 17 майыште Т. Евсеев лӱмеш калыкле тоштерыште «Тоштерыште йӱд-2025» акций лиеш

17 майыште Тимофей Евсеев лӱмеш калыкле тоштерын тӱҥ корпусыштыжо да тудын 6 площадкыштыже «Тоштерыште йӱд-2025» акций лиеш. Тиде кечын толшо уна-влакым тематике экскурсий, мастарлык класс, квиз, арт-терапий, кинопоказ вуча. «Тоштерыште йӱд» акцийын программыже тӱрлӧ ийготан-влаклан келыштаралтын. Йоча-шамычланат оҥай программе ямдылалтеш. Нуным марий кундемын талешкыже дене палымым ыштат, театр представленийым ончыктат, тӱрлӧ площадкыште мастарлык классым ямдылат. Тиде кечын Евсеев лӱмеш калыкле тоштерын тӱҥ корпусыштыжо Кугу Ачамланде сарыште лийше салтак-влакын серышышт нерген каласкалыше «Тихий фронт» ончер почылтеш.