Регион вуйлатышын темлыме почеш  «Марий кеҥеж» фестиваль район-влакымат авалта

Марий Эл Вуйлатыше Юрий Зайцевын темлымыж почеш «Марий кеҥеж» проект визымше гана эртаралтеш. Ий еда 1-ше июнь гыч тӱҥалын 31-ше август марте кажне каныш кечылаште тӱрлӧ площадкылаште 50 наре мероприятий эрта. Нунын коклаште мастарлык класс-влак, спорт турнир ден тренировко-влак, мурышо да куштышо коллектив-влакын концерт программышт, кином ончыктымаш да молат. Пытартыш жапыште уремысе фестивальым Йошкар-Олаште гына огыл, районлаштат эртарат. Эн ончыч тудым Козьмодемьянск олаште чумырымо. Вара – Оршанке ден Юрино районлаште. А эртыше кечылаште – Медведево посёлкышто.