Ончыч маскам чодыраште веле ужаш лийын гын, таче нуно – шкеак яллашке толыт. Эртыше кечылаште «чодыра озам» Медведево район Шоя-Кузнецово ял воктене ужыныт. Специалист-влак амалжым рашемденыт. Шыжым маска-влаклан малаш вочмо деч ончыч коям погаш кӱлеш. Нунын рационышт тиде пагытыште, тӱҥ шотышто, калориян курго гыч шога: пӧчыж, шордымодо, тумлеге. Но кукшо игечылан, вараш кодшо покшым але моло игече аномалийлан кӧра шурно лектыш чӱдӧ лийын гын, чодыраште маска шужа, садлан еҥ илыме верлаш лектеш.