Марий Эл гыч куд регионыш гуманитар полыш каен

Шкенан-влаклан полшена. «Za Марий Эл» фонд 70-ше гуманитар полышым колтен. Ты полыш куд регионыш каен. Тыгай пашам кундемыштына ныл ият пеле шуктат. Тиде гана гуманитар грузым кум фуро да ик «Газель» машинашке пуртеныт. Индеш автомашинам, кок мотоциклым, 20 кубометр пиломатериалым, чоҥаш материалым, генератор, медикамент ден кочкыш сатум, вургемым, беспилотниклан деталь-влакым да вес арвер-влакымат колтеныт. Марий Элыште илыше-влакын погымо посылкылашт тек боец-влакын кумылыштым нӧлта, манын палемдат гуманитар полышым погышо-влак. «Золотые руки ангела», «Сердце матери», «Мари ушем» организаций-влак эреак полшен шогат.