Марий книга издательство савыктыш пӧрт «Государственная национальная политика Республики Марий Эл» кугыжаныш программе почеш идалыклан 20 тӱрлӧ наре книгам луктеш. Тылеч посна вес программе-влакат улыт. Кугыжаныш полыш деч посна, автор-влак спонсор окса дене книгам луктыт. Марий книга савыктыш пӧртын еҥже-влак издательствыште печатлен лукмо книга-влакын презентацийыштым, автор-влак дене оҥай да пайдале вашлиймаш-влакымат эртарат. Кундемнан рӱдоласе книгагудылаштыже, тыгак республикынан районласе школлашкат чӱчкыдын лекташ тӱҥалыныт. Тыгай вашлиймаш-влак книган авторжо, школышто тунемше да тыглай калыкланат пеш кӱлешан улыт. Идалык мучко шуко ончер-презентацийлам эртараш шонат.