СВО-н участникше да ветеран-влаклан пӧлек. Октябрьыште Марий Элын калык артисткыже Светлана Осипова–Шос йолташыже-влак дене пырля концертым эртарен. Погымо шийвундо дене «Защитники Отечества» кугыжаныш фондын регионысо пӧлкаж дене пырля СВО-н участникше да ветеранже-влаклан пӧлекым ыштеныт. Кумданрак – материалыште.
Марий Элыште у медиа агентстве шочын. Республик кӱкшытан чыла газет-влак ынде ик организацийыш ушеныт. У Медиахолдингыш 8 газет пурталтын. Печать СМИ-м пырля ушаш Марий Элым Вуйлатыше темлен. Тиде республикысе периодикын пырля пашам ыштыме у йӧнжӧ. У медиа агенстве нерген мемнан сюжет.
Скандинавийысе коштмашлан шӱмаҥше-влак чумыргеныт. Марий Элыште 6-шо гана нордик-влакын слётышт эртен. Тушко ола да Республикын районлаж гыч команде-влак толыныт. Слёт онлайн формат денат эртен. Кумданрак – материалыште.
Марий ончышым усталык памаш куандара. 2024 ий Республикын икмыняр вӱдышӧ ансамбльже-влаклан лӱмгече идалык семын палемдалтеш. «Марий памаш» ансамбльлан – 50 ий, «Изи памаш»лан – 40 ий, «Эрвел марий» коллективлан – 35 ий, «Пеледыш» ансамбльлан – 65 ий. Ты лӱмгече пайремым коллектив-влак Республикысе калык усталык фестиваль дене пайремлат да кажне кумыланым ты фестивальыш ӱжыт.
У ийыште спортым йӧратыше да тудын дене пеҥгыде кылым кучышо-влакым ятыр старт вуча. Ик эн палыме да вучымо, мутат уке, «Российын ечыгорныжо».Тений тудо 10 февральыште эрта. Тиде да моло танасымаш нерген черетан материал.
2024 ий лӱмгечылан поян идалык. Тений Российысе писатель ушемын Марий Элысе пӧлкажым ыштымылан 90-ле ий. Тудо 1934 ийыште шочын. Тиде жапыште вияҥын до йол ӱмбаке шогалын. Таче тудо могай сомылым шукта да лӱмгече идалык могай лияш сӧра? Тиде да моло йодышым Российысе писатель ушемын Марий Элысе пӧлкажым вуйлатыше Светлана Архипова дене радамлена.
Шинчымашыштым тергат да шке палымыштым ончыктат. Марий Элыште тунемше-влак коклаште Российысе олимпиадын регионысо этапше тӱҥалын. Тудым йӱла почеш француз йылме дене таҥасымаш почын. Йот йылме дене шке шинчымашым улыжат 8 ӱдыр-рвезе терген, молан манаш гын ты предметым оласе икмыняр школышто веле туныктат. Француз йылме дене олимпиаде кок кече шуйна, тиде жапыште тунемше-влак возымаш, колыштмаш да мутланымаш дене кылдалтше заданий-влакым эртат.
Юл да Урал кундемысе композитор-влакын музыкышт йоҥген. Башкортостан Республикысе Уфа олаште композитор, музыковед, мурызо-влакым чумырышо 32–шо фестиваль эртен. Марий Эл ат тушко ушнен. Палемдыман, фестиваль кажне ийын тӱрлӧ регионышто эртаралтеш.
Чарла Кремльыште марий шӱлыш озаланен. Марий тӱвыра рӱдер Йошкар-Олан рӱдыштыжӧ Шорыкйолым эртарен колтен. Уремыште йӱштӧ ыле гынат, калык пайремыш рӱж ушнен, муро да куштымаш полшымо дене ырен. Туштак мужедме да модмо алан-влак пашам ыштеныт. Тидын деч посна организатор-влак мӧчӧр семын чиен толшо-шамычым акленыт. Шорыкйолым кузе палемдет, идалыкым туге илен эртарет, ойленыт кугезына-влак. Ты ӱшан тачат уло, сандене кажне ийын марий-влак ты пайремым шокшын да веселан палемдат, ӱстел тич сийым погат да уна-влакым – Васли Кугыза ден Васли Кувам - вучат.
Лӱдыкшыдымылык правил – икымше верыште. Тыгай шонымаш дене пожар надзорын пашаеҥышт профилактике рейдым эртарат. Чӱчкыдын яллашке лектыт, поснак пайрем каныш кечылаште. Специалист-влак паледмат, тыгай годым чылан пожар лӱдыкшыдымылык правилым огыт эскере. Кужу каныш кечылаште чӱчкыдын мончаш олтат, южгунамже тӱткыш деч посна кодат. Сандене МЧС виктемын специалистышт профилактике рейд кышкарыште пӧрт еда коштыт да эше ик гана правилым ушештарен, суртоза-влаклан кагазым пуат але тудым почто яшлыкыш пыштен кодат.
