Йошкар-Оласе корно-влакым эрыкташ ныл единице техникым налыт. Тидын нерген Йошкар-Оласе администраций увертара. «Город» муниципал предприятийын автопаркше комбинированный корно технике дене пойдаралалтеш, тидлан 30 миллион теҥгем ойырат.
Йошкар-Олаште эше кок йочасадым чоҥен шуктышаш улыт. «Демографий» национальный проект дене рӱдолаште Молодежный микройонышто да Прохоров уремыште 320 верлан йочасад-влакым ыштен шуктат. Таче кечылан чоҥышо-влак шке пашаштым мучашленыт, йыр улшо кумдыкым тӱзатат, изирак архитектур формо-влакым вераҥдат, йоча тӧнежлашке инвентарь да оборудованийым налыт.
Ял озанлык пашаеҥ-влак уржа-сорлам сай кӱкшыт дене иктешленыт. Кугарнян ял озанлык пашаеҥ-влакын профессионал пайремышт лӱмеш погынымаш Конгресс-влакын пӧртыштышт лийын. Мланде пашаеҥ-влакым регион вуйлатыше Александр Евстифеев саламлен. Пытартыш ийлаште кугыжаныш ялозанлыклан утларак полышым ойыра, тений мутлан 1 миллиардат пеле ойыралтын, тидыже, 2019 ий дене таҥастарымаште, 36 % шукырак. Республике прдовольствийым ситышын ышта.
Республикын лӱмгечыжлан пӧлек. Марий кундемнан Элнет эҥержылан пӧлеклалтше муро шукертак калыкыште ила. Тудым Олег Логинов йоҥгалтара. Семым Иван Егоров возен, мутым Василий Регеж-Горохов. Шукерте огыл, МЭТР телеканалын усталык коллективше мурылан клипым ыштен. Тудым таче «МЭТР» телеканалыште ужын кертыда.
«МЭТР» телеканалын пашаже-влак «Смиротворец» конкурсышто аклалтыт. Конкурсын эксперт ушемже «Этнические и локальные СМИ» категорийыште шорт-листым чумырен. Кызыт жюри нине паша-влакым онча. Конкурсант-влак радамыште «МЭТР» телеканал, мемнан коллегына - Наталья Ямаеван пашаже-влак.
