Как претворяется в жизнь резолюция XI Всемарийского Съезда? Сюжет Натальи Ямаевой.

Волжский районлан «Культура» нацпроект дене келшышын,  у «Автоклубым» налыныт. Шуко функциян рӱдерыште мероприятийым эртараш кӱлшӧ оборудований уло. Волжский районышто тудын презентацийжым «Пеледыш пайрем» годым эртараш палемдат. Ешарен кодаш лиеш, ты марте тыгай автоклубым Параньга районлан налыныт, а идалык мучаш марте эше 5 районыш кондат. Республикыште 7 культур рӱдерым налаш 33 миллион теҥге ойыралтын. 

Июль тылзыште «Марий вургем пайрем унала ӱжеш» калык вургемым ончыктымо регион-влак кокласе конкурс лиеш. Тудо ныл номинаций дене эрта: этнографий костюм, кызытсе жаплан келшыше авторын вургемже, сценылык костюм, тыгак кид дене ыштыме курчак. Фестиваль-конкурс 15-17 июльышто лиеш. 

Идалык тӱҥалтыш гыч республикысе 27 йолешке корнотуткарышке логалын. Кодшо ий тыгаяк жап дене таҥастараш гын, туткар-влакын чотышт 60 процентлан шукемын. Тиде кечылаште кугыжаныш автоинспекций профилактике операцийым эртара. ДПС инспектор-влак йолешке да автомашинам виктарыше-влаклан корно правил нерген ушештарат. 

Икымше кварталыште шояк окса-влакым  палымаш 32 процентлан шагалемын. Мемнан республикыштат фальшивке-влак шагалемыныт. Тыге кум тылзыште 21 шояк оксам муыныт. Тӱҥ шотышто – тиде радамыште кугу кагаз окса, 5 тӱжемаш шояк кагаз оксам – 12 , ик тӱжемашым – 4 шекланеныт. Тыгак 10 теҥгеаш тыгыде 4 оксамат муыныт, кодшо ийын тыгайже лийын огыл. 

Йошкар-Олаште аварийныйлан шотлалтше 17 пӧртым пужаш ямдылалтыт. Муниципал погым виктарыше комитет тидын шотышто аукционым эртара. Оласе бюджет гыч тидлан 1 миллион утла ойыралтеш. Йодмаш-влакым 28 май марте налыт, проектым 80 кече жапыште ыштат тӱҥалыт. 2023 ий марте «Тоштемше пӧртла гыч еҥ-влакым кусарымаш» программе дене рӱдӧ олаште 63 портым пужат, а тушто илыше-влаклан йӧнан пачерым пуат. Марий Элыште програмышке 404 пӧрт пурталтын, тушто илыше 7 тӱжемат 54 еҥым кусарышаш улыт. 

Республикыште вес ийын тӱзатышаш объект-влак верч онлайн-йӱклымаш мучашлалтын. Тидын нерген Йошкар-Олан мэрийже увертара. Эн шуко йӱкым погышо оласе кумдыкым вес ийын федерал бюджет кӱшеш тӱзатышаш улыт. Йошкар-Олаште еҥ-влак 19, Волжскышто – 3, да Козьмодемьянскыште – 9 кумдык коклаште ойыреныт. Тӱшка верым да кумдыкын тӱзатыме вер-влакын дизайн-проектышт дене еҥ-влак 12.gorodsreda.ru  платформышто палыме лийыныт да туштак йӱкленыт. 

У тунемме ийыште «Земский туныктышо» программа почеш республикысе школлашке 12 туныктышо пашам ышташ кая. Нуно элнан  тӱрлӧ кундемлаж гыч улыт. Педагог-влак Угарман, Карачаево-Черкесий, Тыва республика,  Санкт-Петербург гыч толыт. Нунын коклаште Марий Элын ик районжо гыч весышке куснышо-влакат улыт. «Земский туныктышо» программыш ушнышо кажне педагоглан федерал бюджет гыч 1 миллион теҥге окса ойыралтеш. Тений ты программе дене келшышын, конкурсыш 28 йодмаш пурен, кодшо ийын 11 туныктышо яллашке пашам ышташ каен. 

Икымше иктешлыше кугыжаныш экзамен. 11 классым пытарыше-влак ЕГЭ-м возеныт. Тӱҥ этап 31 майыште тӱҥалын да 2 июль йотке шуйна. Тидын нерген туныктыш да шанче министерствыште палдарат.  31 майыште тунемше-влак ойырымо предмет дене: литератур, географий, химий дене экзаменым кученыт. 3, 4 июньышто эн тӱшка экзамен эрта – руш йылме дене. Тудым республикыште 3 тӱжем наре йоча кучаш ямдылалтеш. Выпускник-влак коклаште математике, обществознаний да физике предмет-влак йодмашан улыт. Экзаменым республикысе 24 школышто возат, онлайн-трансляцийым эртарашлан видеокамере-влакым вераҥденыт, тыгак чыла кӱлешан оргтехникым налыныт. 

Тений ЕГЭ-м 287 еҥ гыч шогышо комиссий терга. 

«Марий Эл Республикыште здравоохраненийын первичный звенон модернизацийже» регионысо программе дене келшышын транспортым икмыняр районышко колтеныт:  Курыкмарий районышко 5 автомашинам, икте дене Шернур да Волжский районлашке. Медведево районышко тений 5 санитарный автомашина толшаш, кокытшым конденыт. Республикышке «УАЗ» маркан 10 автомашинам кондышаш улыт. Транспорт медпашаеҥ-влакым кондыштараш, эм препарат, биологический материал-влакым кӱлеш учрежденийышке намиен шукташ полшышаш. Модернизаций программе дене келшышын, учреждений-влаклан транспортым уэмдаш 5 ий жапыште федерал да республикысе бюджет кӱшеш 2 миллиард наре теҥгем ойырат. Тиде окса дене 83 единице техникым налыт.