Ик эн тале боксер-влак рингышке лектыныт. Йошкар-Олаште бокс дене республикын чемпионат да первенство мучашлалтын. Тушко 70 утла спортсмен ушнен. Самырык спортсмен-влак шке профессионал моштымашыштым, физический ямде улмыштым ончыктеныт. Республикысе таҥасымаште Юл кундемысе федерал округысо первенствылан сборныйым ойыреныт. Тиде таҥасымашат  мемнан республикыште эрта. Марий Эл гычат спортсмен-влак тушто шке вийыштым ончыктат. 

Сонарзе-влакын писылыкыштым тергат. 6 мартыште Медведево районысо Песчаный поселкышто сонар биатлон дене регион кокласе турнир лиеш. Тушко районлаште сеҥышыш лекше 30 наре команде чумырга, чылаже 100 утла сонарзе таҥасаш тӱҥалеш. Марий Элыш Киров, Угарман кундемла гыч сонарзе-влак толыт. Тений икымше гана сонар биатлоныш ӱдырамаш команде-влак ушнат. 

Йошкар-Ола сылне верже дене ойыртемалтеш. Мемнан кундемышке толын кайымаш йот элышке миен коштмымат алмаштен кертеш. Марий Элын рӱдӧ олаже йот эллашке кайыме олмеш ойырымо 10 ола-влак радамышке пурен. Йодыштмашым онлайн-сервис полшымо дене эртареныт. Специалист-влак палемдат: Йошкар-Олаште тӱрлыжымат ужаш лиеш: Спасский башьнын, Москвасе Кремльын, тыгак Василий Блаженный храмын копийже-влакым. Эше икмыняр объект дене Йошкар-Ола Европа гай коеш. Пошкудо регионысо Озаҥ олат  тиде рейтингышке пурен. Тудым кугу рудӧола-влакын миксшылан шотлат. Озаҥыште Стамбул, Вена, Прага, Парижын сыныштым ужаш лиеш. Рейтингышке тыгак Петербург, Калиниград, Кисловодск, Выборг, Рыбинск, Красный Поляна, Петропавловск - Камчатский улыт. 

Марий Элыште тиде черлан кӧра ик еҥ ӱмыр лугыч лийын, пытартыш суткаште 25 еҥлан тиде диагнозым шынденыт. Тазалыкаралтыш министерстве увертара: ковид-стационарлашке 36 еҥ логалын. Тачысе кечын стационарыште 393 пациент эмлалтеш, 178 еҥын коронавирус пеҥгыдемдалтын, 18 еҥ ИВЛ аппарат полшымо дене шӱла. Пандемий жапыште регионышто чылаже 11 тӱжемат 845 еҥлан коронавирус диагнозым шынденыт, 172 еҥ тиде черлан кӧра ӱмыр лугыч лийын. 

ГИБДД пашаеҥ-влак автомашинам виктарыше ӱдырамаш-влаклан пеледышым пӧлеклат. Республикыште «Автоледилан пеледыш» акций эрта. Йошкар-Олан уремлаштышже ДПС экипаж ӱдырамаш-влакым саламла. Полиций пашаеҥ-влак корно правил эскерымым шотышко налыт, эн чечен-влаклан нуным умылтарат, ӱдырамаш кече дене саламлат. Ведомствышто увертарат: тиде акций республикыште йӱлашке пурен, тудо 8 март марте – ик арня шуйна. 

Каныш кечылаште Марий Эл коммерческий огыл организаций-влакын тӱнямбалсе кечыжым палемдымашке ушнен. Мемнан регионышто 700 наре тыгай организаций уло- тиде ветеран-влакын ушемыт, мер ушем да тӱрлӧ объединений-влак. Ушештарена, ушем але организаций парышым ыштен налаш огыл ышталтын гын, тудо коммерческий огыл организацийлан шотлалтеш. Пытартыш ийлаште НКО-влак социал йодышым рашемдымаште тыршат: илалше, инвалид-влаклан полшат, янлыкым аралымашке ушнат, экологий верч тургыжланат.

Федерал кугорно-влакым вӱд ташлыме жаплан ямдылат. Тидын нерген «Волго-Вятскуправтодор» увертара. Корным чоҥышо да шотышто кучышо-влак Марий Элыште федерал кугорнылаште шошо пагытыште чылажат икшырымын лийже манын тыршат. Лишыл жапыште подрядчик-влак корно воктене улшо пуч-влакым лум дечын эрыкташ тӱҥалыт, а 23 март гыч корным да корно сооружений-влакым утларак тӱткын эскераш тӱҥалыт. Корно службо-влак ошмам, тыгыде кӱйым, керамзит, пиламатериалым ямдыленыт. Пашам шукташ бригаде-влакым чумыреныт, 20 единице техникым лӱмын ойырымо. Корнылаште кӱварым, эҥерлашке йоген кайыме вӱд верым эрыктат. 

Февраль тылзыште кундемым виктарыме шотышто рӱдер еҥ-влак дечын пурышо 600 утла йодышым тӱрлӧ ведомствылашке колтен. Эртыше тылзыште еҥ-влакым вӱд шотышто, тыгак пӧртлаште шокшо укелык, шала коштшо пий-влакын шукеммашышт тургыжландарен. Тыгак кумдыкым тӱзатыме шотыштат азапланеныт. А теве корным да кудывече-влакым эрыктыме шотышто вуйшиймаш шагалрак пурен. Йошкар-олаште илыше-влак пел ийлан Петров уремым петырыме шотышто йодыныт. Рӱдоласе администраций микрорайонышто кузе каяш, транспортын эртымыже шотышто вашештен. Тений кундемым виктарыме шотышто рӱдер Воин-Интернационалист уремыште да Руэм поселкышто вӱд пучын лунчыргымыжо шотышто йодышым рашемдаш полшен. 

Оршанка районышто идалык мучаш марте очистной сооруженийым чоҥат. Объектым Шулка селаште тений октябрь марте ыштен шуктышаш улыт. «Госзакупки» сайтыште палемдыме: объектым ышташ районысо бюджет гыч 12 миллион теҥге ойыралтеш. Сооружений ик суткаште 80 кубометр лавыран вӱдым эрыкташ тӱҥалеш. Подрядчик канализацийым чоҥа, тыгак йыр улшо кумдыкымат тӱзата. 

Озанлык-влак шошо агалан ямдылалтыт. Пырчым ситарат, техникым тӧрлат, ӱйлымӧ-шӱрымӧ материалым шапашлат. Регион вуйлатыше Александр Евстифеевым тиде паша дене Республик виктер вуйлатышын икымше алмаштышыже Александр Гречихо палдарен. Мемнан кундемыште нӧшмӧ ситышын уло. Тачысе кечын 102 процентымат ямдылыме. Шошо жаплан республикыште 6 тӱжем тонн ӱяҥдышым ситарышыш улыт, тачысе кечын 4 тӱжем тоннжым конденыт, тиде кӱлмӧ дечын 65 процент. Марий Элыште тений 295 тӱжем гектар кумыдыкышто пырчым да шудым ӱдышаш улыт, тидыже кодшо ийысе дечын 2 тӱжем гектарлан шукырак. Кокияшым 45 тӱжем гектарыште ӱденыт. Технике нерген ойлаш гын, шошо ага вашеш 12 единице техникым налыныт, пасулашке чылаже 1609 трактор лектеш. Ӱйлымӧ-шӱрымӧ материалым тений кодшо ий дечын утларак ямдылыме. Тидын нерген Александр Гречихо увертарен. Вашлиймаште кадр  йодышымат нӧлталыныт. Пасулаште пашам ышташ 880 механизатор кӱлеш, тачысе кечылан 728 еҥ уло, молыштым жаплан ойпидыш дене налаш палемдат.