Эшкинин уремыште икмыняр национальный проект дене пашам шуктат. Асфальтын реконструкцийже дене пырля, тыште йӱр вӱд йогымо канализацийым, тротуар-влакым шотышко конденыт. Пашам августышто мучашлышаш улыт ыле, но июль мучаште ыштен шукташ палемдат. Тиде уремыште паша радам дене мэр Евгений Маслов палыме лийын. Ушештарена, Эшкинин уремыште пашам апрельыште тӱҥалыныт. Тыште икмыняр медучреждений, «Мои документы» шуко функциян рӱдер, тоштер верланеныт, шуко транспорт коштеш. «Лӱдыкшыдымӧ да сай качестван автомашина корно», тыгак «Оласе йӧнан среда» нацпроект-влак пашам шукташ полшат. Олан мэрже палемден: кодшо пашам ик арня жапыште мучашлышаш улыт, кызыт шудым ӱдат, тыгак шӱкым кораҥдат. 1 август марте улшо ситыдымашым кораҥдышаш улыт да урем у тӱс дене волгалтшаш.
Комментариев: 0