Йошкар-Олаште у магистральный корным ыштыме годым жапым шотышко налман. Александр Евстифеев Киров урем тӱҥалтыш гыч Ширяйково микрорайон гоч Строителей урем марте эртыше магистральный корно ыштымым ончен. «Лӱдыкшыдымӧ да сай качестван автомашина корно» национальный проект дене «Дорожная сеть» регионысо проект дене пашам икмыняр ий шуктышаш улыт. Таче кече марте 2019 ий декабрьыште пеҥгыдемдыме кок контракт дене 205 тонн ошмам оптеныт, газопроводым вес вере колтеныт. Август мучаш марте йолешке-влаклан корнывончакым ыштен пытарышаш улыт, кызыт канализацийым вес вере кусарат. У кугорно Йошкар-Олан кок тора районжым уша, тыгак олан рӱдӧ ужашыште неле транспортым шагалемдаш полша. Кугорнын кужытшо 4 километр наре, тушто кӱвар, кӱртньыгорно гоч путепровод лиеш. Пашам икмыняр этап дене шуктат. Транспорт инфраструктурым ышташ 6 млрд теҥгем палемденыт. Тений федерал бюджет гыч 490 млн теҥгем ойырымо. Александр Евстифеев генеральный подрядчиклан пашам жапыштыже шукташ да улшо правилым эскераш темлен.
Комментариев: 0