Юл кундем федерал округын эн мастар театр коллективше-влакым увертареныт. Тидым «Театральное Приволжье» фестивальым иктешлыме кышкарыште ыштеныт. Усталык таҥасымаш ПФО-н 14 регионжо гыч йоча да самырык коллектив-влакым ушен. Нуно пытартыш ийлаште шындыме ик эн сай пашаштым калыклан да жюрилан ончыктеныт. Спектакльым, артист-влакым да режиссёрым лӱмын чумырымо комиссий аклен. Жюрин еҥже-влак палемдат, тиде кум ийыште коллектив-шамыч койынак кушкыныт, педагог-влакын пашаштат сайынак коеш. Иктешлымаш почеш, самырык коллектив-влак коклаште икымше вер дене Пермь кундем гыч коллектив палемдалтын. Тудын ямдылыме «Корова» постановкыжо жюри деч эн шуко баллым поген. А йоча театр-влак кокла гыч икымше верыш Саратов кундемысе труппо лектын. Сеҥыше да призёр радамыш логалше театр-студий-влаклан грантым пуэныт. 1-ше верыш лекше коллективлан 200 тӱжем теҥге, 2-шо верлан – 150 тӱжем, а кумшылан – 100 тӱжем. Ты шийвундо у постановкым шындаш виктаралтеш. Тений фестивальыште Марий Элын чапшым кок коллектив арален. Тиде Оршанке посёлкысо «Спутник» самырык-влаклан театр да «Дебют» йоча образцовый театр. Кеч нуно сеҥыше-влак радамыш лектын огытыл, самырык артист-влакын кумылышт волен огыл. Фестивальлан кӧра нуно шке опытыштым пойдареныт да икияш артист-влакын мастарлыкыштым ончалыныт.
Комментариев: 0