Марий Эл Республиклан федерал бюджет полшымо дене ординатурышто тунемашлан 45 целевой верым ойырымо. Врач-влак 22 специальность дене тунемаш тӱҥалыт. 6 вер акушер-гинеколог, 5 вер терапевт, онколог, тӱшка практикын врачше, педиатр, 3 вер хирурглан ойыралтын.
Ончыкылык врач-влак тӱҥ шотышто Озаҥ оласе да Киров медицине кугыжаныш университетыште, Ижевск, Ульяновск, Саранск, Самара, Йӱдвел Осетий, Ингушетий да Москваште тунемаш тӱҥалыт. Республикысе эмлымверлаште антестезиолог-реаниматолог-влак огыт сите, но тений ординатурышто 2 верым гына ойыреныт. Тений коронавирус инфекций черым эмлаш полшышо, волонтер пашашке ушнышо да ординатурышко пурышо-влаклан ешартыш баллым шотлат. Кок ий гыч ординатурым тунем пытарыше 45 у врач республикышке толшаш.
Комментариев: 0