Йошкар-Оласе эше ик тошто пӧртым реставраций вуча. Кумдан чапланыше Пчелинын пӧртшым шукын палат. Тудо Карл Маркс уремыште верланен. А теве Какшан серыште тудын родыжын, купеч вате Анна Петровна Пчелинан пӧртшӧ нерген шагал колыныт. Тудат рӱдолаштына ик эн тошто полатлан шотлалтеш. Анна Пчелинан пӧртшым 1916-шо ийыште чоҥымо. Тачысе кечылан тиде пӧрт историй да тӱвыра памятник статусым нумалеш. Да пытартыш жапыште тудым уэмден ачалаш кӱлмӧ нерген мутым луктыныт. Ӱмаште Тӱвыра министерстве тиде пашалан проект документацийым шотыш кондаш темлен. Тачысе кечылан тиде пӧртым тӱрлӧ специалист-влак тергат, шымлат да могай ачалымаш пашам шукташ кӱлмӧ нерген каҥашат. Тидлан лӱмынак Озаҥысе Епархийын проект-реставраций мастерскойжым ӱжыныт. Кызыт кугыжаныш историй да тӱвыра экспертизын пунчалжым вучат, вара реставраций пашалан пижыт.
Комментариев: 0