Марий Эл вуйлатыше Юрий Зайцев Ульяновский областьысе воинский частьыште лийын, тушто ямдылалтмашым эртыше марий кундемын шочшышт дене вашлийын. Мемнан кундем гыч частичный мобилизаций дене порысым шукташ кайыше-влак икмыняр пунктышто тунеммашым эртат. Пӧръеҥ-влаклан гуманитарный полышымат намиеныт, тушто шокшо вургем, кӱлешан арвер-влак. Юрий Зайцев пӧръеҥ-влаклан палемден: тудо социал кыллашке пурышо йодыш, темлымаш-влакым лудеш да шотышко налеш. Мобилизованный-влакын ешыштланат полыш ойыралтеш. Мобилизованный-влак Юрий Зайцевлан йодышыштым пуэныт, социал гарантий, ешлан полышым ойырымо нерген тургыжланеныт. Ульяновск да тудын воктене марий кундем гыч пӧръеҥ-влак икмыняр частьыште ямдылалтмашым эртат. Юрий Зайцев кум частьыште лийын. Пӧръеҥ-влакым тӱрлӧ частьлашке колтат, тыгак марий кундем гыч погынышо рвезе-влакым бригадышкат чумырат. Юрий Зайцев палдарен, гуманитарный полышым чумыраш шукын полшат: предприятий вуйлатыше, фермер, чыла кумылан еҥ-влак. Тиде гана медицин препарат-влакым, спальный мешокым, бензин генератор, тепловой пушко, инструмент-влакым намиеныт. Ончыкыжым раций, бронежилет, квадрокоптер, бинокльым кӱлмӧ семын колташ тӱҥалыт. Юрий Зайцев тыгак Ульяновский областьын губернаторжо Алексей Русских дене вашлийын.
Комментариев: 0