Марий Эл Телерадио » Марий Эл Радио » Юрий Зайцев Куженер кундемышке миен да верысе предприятийлаште лийын

12:51, 17-08-2022Юрий Зайцев Куженер кундемышке миен да верысе предприятийлаште лийын

Юрий Зайцев Куженер кундемышке миен да верысе предприятийлаште лийын. Эн ончыч тудым «Акашевский» чыве фабрикыште вашлийыныт. Юрий Зайцев производствын ойыртемжым ончен да продукцийым аклен. Тудо палемден: чыве фабрикын ыштен лукмо продукцийже республикыштына веле огыл, ӧрдыж кундемлаштат йодмашан. Тидыже предприятийым умбакыже кумдаҥдаш да вияҥдаш таратышаш.
Тыгак Юрий Зайцев «Булочка» пекарньыште лийын. Кондитер изделий-влакым ыштыше изирак предприятийым самырык амалкалче Александр Влизко социал контракт полшымо дене кодшо ийын почын. Тачысе кечылан тушто 30 тӱрлӧ продукций ышталтеш. Юрий Зайцев амалкалчын тӱҥалтыш ошкылжым сай могыр гыч палемден да йӧн лийме семын пашажым вияҥден колташ полшаш сӧрен.
Лишыл жапыште Куженер школ пеленсе кумдыкым тӱзаташ тӱҥалыт. Тыгай задачым Марий Эл вуйлатышын пашажым жаплан шуктышо шынден. Школым ончаш мийымыж годым, ты участкым у тунемме ий деч ончыч тӱзаташ кӱлмӧ нерген ойлен. Школым капитально олмыкташ вес ийлан гына палемдыме. Мутат уке, школышто ачалымаш паша икмыняр этап дене ышталтын, но тӱрыснек уэмдаш йӧн лийын огыл. Туныктыш да шанче министр Лариса Ревуцкая Юрий Зайцевлан школым шотыш кондымо нерген каласкален.