Волжск олаште азам ыштыме у отделенийым почыныт. Тудо Волжск ола, тыгак Волжский, Морко, Звенигово районла гыч ӱдырамаш-влаклан медицин полышым пуаш келыштарыме. Тылеч ончыч мӱшкыран ӱдырамаш-влак Йошкар-Олашке азам ышташ коштыныт. Кум пачашан зданийым ончычсо корпус дене ушеныт. Тушто приемный покой, азам ыштыме да операционный блок, тыгак азам ыштыме дечын вара ӱдырамаш-влаклан отделений улыт. Эмлымверым у оборудований дене келыштареныт. Идалык жапыште ик тӱжемат 500 йоча ош тӱням ужын кертеш. Азам ыштыме отделенийым почмашке регион вуйлатыше миен.
Волжскышто лийме годым Юрий Зайцев «Ариада» ий-унагудо комплексыште лийын. Тудым икмыняр ий огыт кучылт, зданийым тӧрлаш кӱлеш. Регион вуйлатыше вес объектыштат лийын – тиде оласе тӱвыра рӱдер. Тудым 1972 ийыште ыштеныт, тудымат капитально тӧрлаш кӱлеш. Нине зданий-влак шотышто регион вуйлатыше совещанийым эртарен да оласе объект-влакым шотышко кондаш кӱлмӧ нерген ойлен.
Комментариев: 0