Звенигово районысо Кокшайск селаште у врачебный амбулаторийым чоҥат. Юрий Зайцев Россий Президентын Юл кундемысе федерал округышто ӱшанеҥже Игорь Комаровын граждан-влакын приемышкыжо видеоселектор йӧн дене ушнен. Звенигово район гыч Геннадий Изиляев Кокшайскыште амбулаторийым чоҥаш йодмаш дене лектын. Кызыт медучреждений 1958 ийыште чоҥымо тошто объектыште верлана. Юрий Зайцев палемден: «Тазалыкаралтышын первичный звенон модернизацийже» программе дене объектым ышташ тӱҥалыныт. Зданий ик пачашан лиеш, тудым кермыч дене оптат. Тушто терапевт, стоматолог, педиатр, гинекологын кабинетышт лийыт. Кызыт амбулаторийын негызшым ыштеныт, цокольым оптеныт. Объект 20 процентлан ямде. Юрий Зайцев палемден: амбулаторийым тений декабрь марте чоҥен шуктышаш улыт.
Комментариев: 0