Марий Эл вуйлатыше Юрий Зайцев Йошкар-Олалан 440 ий темме пайремлан пӧлеклалтше мероприятий-влакым ямдылыме йодыш дене совещанийым эртарен

Марий Эл вуйлатыше Юрий Зайцев Йошкар-Олалан 440 ий темме пайремлан пӧлеклалтше мероприятий-влакым ямдылыме йодыш дене совещанийым эртарен. Тидлан оргкомитетым ыштеныт. Тений 30 январь гыч 4 февраль марте ВДНХ-ште «Россия» тӱнямбал выставке-форумышто Марий Эл Республикын рӱдолажын – Йошкар-Олан – арняже эрташ тӱҥалеш. Пайремын кугу мероприятийже-влакым 6 гыч 11 августлан палемдыме. 30 утла площадке лиеш. Тидын годымак олан историй ужашыжым уэмдаш шонат. Тиде Рӱдӧ тӱвыра да каныме паркыш пурымаште аркым реставрироватлаш, Чулковын усадьбыжым олмыкташ. Тидлан ешартыш окса кӱлеш. Йошкар-Олан мэрже Евгений Маслов каласен: пайрем олан чыла районыштыжо келыштарыме икмыняр площадкыште эрташ тӱҥалеш. Тудын мутшо почеш, мемнам кугу пайрем вуча, тӱрлӧ республик да регион гыч уна-влакым ӱжыт.