Йошкар-Олаште чодыра пожарлан пӧлеклалтше «Зелень и пепел» ончер почылтын.
Тушто художественный училищын студентше-влакын да Россий художник ушемын самырык-влакын пашаштым ужаш лиеш. Экспозиций 2021 ий августысо событий-влаклан пӧлеклалтын, тунам чот шокшылан да тале мардежлан кӧра Куяр лесничествыште пожар ылыжын. Тунам Йошкар-Олам да пошкудо регионлам шикш леведын. Тул ваштареш кучедалаш 350 утла еҥ лектын - вес кундемла гыч толыныт, чодырам йӧртеныт да тул ваштареш кучедалше-влаклан полшеныт. Тиде чумыр азап да шӱлыш вий «Зелень и пепел» выставкын негызше лийыныт: сӱретче-влак пӱртӱслан ышталтше эҥгек нерген живопись да графике йылме дене каласкалат. Ончер Йошкар-Ола, Кремлевский урем, 26-шо пӧрт, 1-ше пачаште пашам ышта.
Фото: vk.ru/hudozhniki_mariel