Марий Элыште идалык жапыште инфляций 3,7% шуын. Тидын нерген Россий банкын регионысо виктемже увертара. Юл кундемысе федерал округысо регионлаштат тынарак кушкын. Российыште тичмаш ончалмаште инфляций – 3,6%. Тидлан кӧра, сату да калыклан темлыме услуго мыняр-гынат шергештын.
Мутлан, август тылзыште пакчасаскалан ак ӱмашсе гаяк лийын, лач помидор шергештын. Моло саскалан ак кушкын. Амалже - вес элла гыч тудым шагалрак конденыт, а йодмаш пандемий тӱҥалтыште кугу лийын. Поснак цитрус саскалан. Шыллан ак кӱзен. Тидым аналитик-влак теве кузе умылтарат. Еҥ-влак кеҥежым шке кундемыштак каненыт, садланак пӱртӱсышкӧ утларак лектыныт.
Кечывалвелне тений кеҥеж шокшо лийын, южо вере кечшудо кошкен, садланак регионлаште кушкыл ӱйлан ак шукылан огыл гынат - шергештын. А теве шемшыдаҥ, рис да манный шӱраш шулдештыныт. Тӱнямбал кӱкшытыштӧ пырчылан ак кӱзен, садланак кинде, макарон сату шергырак лийын.
Августышто еҥ-влак дезинфекций сатум утларак налаш тӱҥалыныт, тидлан кӧра, тудын акше кугемын. Санаторий, каныме пӧрт-влакын августышто почылтмекышт, тушко миен толаш шергыракын шуын.
Тений абитуриент-влак тунемаш пураш документым дистанционно колтеныт, коштшо шагаллан кӧра, кӱртньыгорно транспортланат билет ак кӱзен огыл.
Комментариев: 0