Марий Элыште «Геройын ачаже» проектын фотосессийже тӱҥалын. Портретлаште боец-влакын ачашт ‒ боевой действийын ветаранже-влак. Нуно эргыштын фотоштым кучат, тыгак китель да награде-влакымат ужаш лиеш. 
Шернур район гыч Сергей Шучин тиде проектыш ушнен. Тудо спецоперацийыш доброволец семын, Павел эргыжым кычалаш каен. Икмыняр жап гыч ӱмыр лугыч лийше боецым муын. Сергей Шучин эргыжын позывнойжым налын да тудо танковый батальоныштак службым эрташ тӱҥалын. Тиде проект кажныжлан моткоч шерге. Шочмо элым аралыше-влакын патырлыкыштым, нунын дене кугешнымашым ончыкта.