Российын кум регионышто илыше марий-влак шыже кумалтышыш лектыныт.
18 шыжаште - Санкт-Петербург да Ленинград областьыште илыше марий-влак шыже кумалтышым эртареныт. Тудо Войеково поселко воктенысе шнуй отышто лийын. Организатор-влакын увертарымышт почеш 2019 ийысе семынак комбо да лудо дене кумалыныт. Кумалтыш сомылым Санкт-Петербург олаште илыше, ХI Марий калык погынын делегатше, онаеҥ Эчан Иванов шуктен. Тудлан «Ший корно» марий автономийын чолга еҥже-влак Эчан Кайнеев ден Юрий Брутов полшеныт.
19 шыжаште Пермь кундем Суксун район Сулий ял отыш икымше гана марий-влак кумалтышыш лектыныт. Парма велне илыше марий-влакым тушко тичмаш кинде сукыр дене миеныт.
22-шо шыжаште Пошкырт кундем Калтаса районысо У Орьямучаш ялыште, пел курым утла жап эртымеке, Юмыланпуымаш отым угыч почмо. Онаеҥ-влак Геннадий Пастиев ден Виталий Искаков, онапум ойырен налын, погынышо калыклан юмын йӱла радамым умылтареныт. Ял калык кумалме верыш кочкыш-йӱыш дене миеныт.
26 шыжаште Пошкырт кундем Нуриман район Шаде ял отышто кумалтыш эрта. 100 ий тушто кумалме сомылым ыштыме огыл улмаш, 2018 ий гыч эртараш тӱҥалме.
Комментариев: 0