Калык писатель Мария Илибаевам шарнен, Пошкырт кундем Балтач район Ӱлыл Йыванай ялысе школ пырдыжеш уста писательлан шарнымаш оҥам почыныт. Тиде школышто ончыкылык писатель шинчымашым поген. Шарнымаш оҥам почмо кечым арам огыл 20 октябрьлан палемденыт. Тиде кечын ила ыле гын, Мария Илибаева 70 ийым тема ыле, тудын ӱмыржӧ тений авгусышто кӱрылтын. Мария Илибаева Н.К.Крупская лӱмеш марий кугыжаныш педагогик институтым тунемын пытарен, тудо марий да руш йылме дене лекше 12 сборникын авторжо семын палыме. Тудын романже «Кугу тӱня шыгыр тӱня», «Тиде ушдымо тӱняште» да молымат калык лудеш, тудын возымо «Орина кова» повестьшым школ программышке пуртымо. Ешарен кодаш лиеш, марий сылнымутшто романым возышо ӱдырамаш-влак коктын веле улыт, Зинаида Каткова да Мария Илибаева.
Комментариев: 0