Морко районышто титак деч посна репрессийышке логалше-влакым шарныме лӱмеш обелискым почыныт. Тудым Чӱкшӧ курык воктен верланыше Кугу Шоръял ялеш шындыме. Чӱкшӧ курык – Марий Эл Республикын эн кӱкшака верже, сандене обелиск лач тиде ялеш верланаш келша манын, пунчалым ыштеныт. Обелискым почаш Кугу Шоръялын эргыже, мер пашаеҥ, врач Юрий Петров темлен. Тудым кум ий наре чоҥеныт. Пашам калык окса дене ыштме. Тидын дене пырля обелискым почмо кечын, «Морко районышто еш-влакым раскулачиватлыме шотышто стенд да стенгазетым ыштыме» конкурсым иктешленыт, сеҥыше да участник-влаклан сертификатым да шарнымаш пӧлекым кучыктеныт.
Комментариев: 0