Школлаште йоча-влакым кузе пукшат? Тидым Роспотребнадзорын специалистышт эреак тергат. Марий Элыште шокшо кочкышым 253 школышто пукшат. Тудым пищеблоклаште ямдылат. 1 гыч 4 класслаште тунемше-влакым яра пукшат, тидлан 53 теҥге ойыралтеш. Тений шокшо кочкышым чыла тунемше-влак кокла гыч 87% кочкеш. Тидын дене пырля 73 тунемме верыште буфет-влак улыт.
Тений специалист-влак школысо кочкышым тергыме шотышто рейд дене 27 гана лектыныт. Санитар правилым пудыртымылан 32 административный пашам возеныт. Пудыртымаш-влак тыгай улыт: помещений-влакын санитар-гигиене могырым келшыдымышт, кӱмыж-совла да инвентарьым мушмо режимым пудыртымаш, пищеблокышто документацийым кӱлдымын кучымаш, каткалалтше эмаль дене кӱмыж-совлан улмышт. Школ кочкышым специалист-влак микробиологий, физико-химический показательлан тергат. Тыште гын, нормылан чылажат келшен толеш.
Комментариев: 0